बारा – बाराको फेटामा सोमबार आयोजित कार्यक्रममा नेपाली कांग्रेस, नेकपा एमाले लगायतका दलका २ सय भन्दा बढी नेताकार्यकर्ताहरू जनमत पार्टीमा प्रवेश गरेका छन्। जनमत पार्टीले आयोजना गरेको पार्टी प्रवेश कार्यक्रममा नवप्रवेशीहरूलाई जनमत पार्टीका राष्ट्रिय अध्यक्ष डा. सीके राउत, मधेस प्रदेशका मुख्यमन्त्री सतीश सिंह लगायतले पार्टीमा स्वागत गरे।
कार्यक्रमलाई सम्बोधन गर्दै जनमत पार्टीका अध्यक्ष राउतले कांग्रेस र एमालेले देशमा दुई पार्टीबाहेक अन्य पार्टी नहोस् भन्ने चाहिरहेको आरोप लगाए। उनले भने, ‘दुई पार्टी राख्ने षड्यन्त्र भइरहेकोले हामी सचेत रहनुपर्छ, हामीलाई बहुदलीय लोकतान्त्रिक व्यवस्था चाहिन्छ, दुई दलवाला होइन।’
राउतले संघीयताका कारण देशमा सात वर्षमै गाउँ गाउँमा सडक निर्माण भएको जिकिर गरे। उनले मधेसमा दलित, मुस्लिम, मुसहरसित भूमि नभएको बताउँदै पहाडबाट लाखौं मानिसलाई ल्याएर भूमि बाँड्ने र ३५ लाख मानिसलाई लालपुर्जा दिने षड्यन्त्र भइरहेको बताए। देशमा काम गर्नको लागि प्रत्यक्ष निर्वाचित प्रधानमन्त्री र राष्ट्रपति हुनुपर्नेमा राउतले जोड दिए।
कार्यक्रमलाई मधेसका मुख्यमन्त्री सिंहका साथै जनमत पार्टीका अन्य नेताहरूले पनि सम्बोधन गरेका थिए।
ADVERTISEMENT
